Chi ie pa l Cunsëi?
L Cunsëi de furmazion ie na grupa de lëur metuda adum da reprejentanc de lies defrëntes che sustën y pieta scumenciadives cultureles y de furmazion tl luech.
Fins
L fin dl Cunsëi de furmazion ie chël de cuordiné duta la scumenciadives cultureles y de furmazion che vën metudes a jì dala lies defrëntes. L cunsëi cunstatea l bujën de furmazion per i granc te si raion.
L Cunsëi juda cun cuntribuc finanziei chësta ativiteies dla lies che, aldò dla lege sun la furmazion (l. pruv. nr. 41 dl 7.11.1983), sustën la chemun l lëur de n Cunsëi de furmazion y tres chësta vëniel garantì n finanziamënt nce da pert dla pruvinzia.
Plata de nfurmazion
L Cunsëi de furmazion publichea uni doi mënsc n cunlaurazion cun la redazion dla plata de chemun, duta la manifestazions atueles tla plata de chemun. Tres chësc mesun iesen boni de fé alsavëi ai zitadins dut cie che l vën dant tl luech.
Nce tla plata Internet www.manif.it dl Servisc furmazion Gherdëina dl Istitut ladin "Micurà de Rü", iel da n valgun ani incà da udëi duta la manifestazions. Chësta plata vën drët prijeda y dà la puscibltà de udëi dut cie che l vën metù a jì tla valeda. Da d'ansciuda y da d'autonn vëniel sëuraprò publicà l calënder dla manifestazions de Gherdëina.
Presidënt y Cunsëi
Karl Silgoner ie dai 8 de juni dl 2004 presidënt dl Cunsëi de furmazion y l reprejentea nce la grupa oradecà.
Tl Cunsëi fejel al mumënt pea truepa lies y grupes; chëstes se dà ju cun la cultura y la furmazion y les urganisea na bela vela de scumenciadives (ne cumpedon nia su duta la lies, davia che l nen ie na bela gran cumpëida).
L'atività dl Cunsëi de furmazion se cunzentrea ti ultims ani nce sun ponc mpurtanc coche pruiec. Tl 2006 iel unì nvià via n pruiet sun la comunicazion. "Comuniché creativamënter o passivamënter tla vita da unidì" fova l titul dla lingia de manifestazions che ie unides a se l dé ntan l autonn. L nteres y la cunlaurazion danter la lies y la istituzions a livel de valeda fova granda coche nce la partezipazion da pert dla populazion.
Per l 2007 iel prugramà n pruiet sun l argumënt: "Vita da unidì - lëur y mestier". Tres chësc tema uelen arziché n ciamp tla vita dla persona y dé n cuntrribut ala reflescion critica dll mumënt y ala furmazion cusciënta de na majera identità soziela y ndividuela.
| 
